القائمة الرئيسية

الصفحات

 

نصرالدين السويلمي


هاي زادت وحدة لحڨت! ما فهمناش شنو العلاقة بين اضراب الجوع وبين ائتلاف الكرامة؟

علاقة عامة.. علاقة خاصة.. علاقة أبوية.. علاقة روحية.. علاقة عرقية.. علاقة دينية.. علاقة عاطفية.. علاقة زوجية.. علاقة اسرية.. علاقة وطنية.. علاقة دولية.. علاقة ودية.. علاقة رسمية..

كي تركز تلقى هذا الكل ما عندو حتى دخل!

العلاقة في أصلها علاقة انتخابية!

كيفــــــــــــــــاش؟

الجماعة ماهم عملو حزام للرئيس ما نفع، مشو للعسكر مشو للاتحاد مشو للداخلية مشو للاعلام مشو لنقابة الصحفيين مشو للهايكا.... شيء! بعد فاقو الي هوما افلسو شعبيا، والّي البورصة السياسية فيها زوز حزاب طالعين وحزب كبير مستقر..

باهي نركزو شوي!

هوما ماهم في قديم الزمان كانو ثوريين والا هكا يقولو، معناها قبل ما تنسحب عليهم "نظرية النشوء والانحطاط" تي متاع داروين، وكيف عرفو الي قاعدة عبير صعيب يفكوهالها، قالك خلينا نرجعو في الطرح نحاولو نفكو قاعدة الائتلاف، لعبو على قاعدتو الثورية بما اني قاعدتو متاع الهوية صعيب يستميلوها خاصة بعد التغفيصة متاع مشروع بشرى متاع الميراث.

باهي كيفاش باش ينسّلو من عند الائتلاف ويغطو رواحهم بعد ما تكشفت سوءاتهم شعبيا؟

الحل الوحيد يلعبوا خطة عبير 0-0-11 حتى الڨول الڨدام!

كيفااااش؟!! وشكون يغطي عليها كي تهبط بكلها وحتى الشبكة تخليها فارغة؟

أوووووه حتى انت! تي الاعلام يغطي وجماعة الفلوس يغطو والنخب تغطي والنقابات تغطي والاحزاب تغطي والڨومية يغطو والصبايحية يغطو.. تي حتى جماعة شلاغم ستالين وجماعة امينة فيمن وجماعة شمس حطوا يديهم في دين بعضهم وخدموا غطاية عند عبير... تي هي هابطة بكلها للهجوم ماي عارفة عندها بــطيون متاع عار يغطي عليها.

خلينا من عبير.. نرجعوا للفـــــان متاعها! عاد هانهم ركزو على الكرامة واستعملو طريقة عبير، ڨالو مادام الزرقيوني ڨال طريقتها تجيب معناها تجيب...هانهم خففو على النهضة وشدو في الائتلاف..

الي كانو يقولوا فيه في النهضة الكل طوال 10 سنين قالوه في الائتلاف في بعض اشهر... حتى الملف السري ڨالو راو الائتلاف عندو ملف سري وباش يجبدو سيد الرئيس.. مازالت كان الغرفة السوداء هاي في الثنية، ومازال شعارهم المفضل " يا غنوشي يا سفاح يا قتّال لرواح" قريبا وقريبا جدا " يا مخلوف يا سفاح يا قتّال لرواح".

إنهن يمخمخن بالدرڨة من أجل اسقاط ائتلاف الكرامة..

نصرالدين السويلمي

 


هل اعجبك الموضوع :
اعلان منتصف الموضوع